港鐵站交收「捉得好緊」？深水埗站查票惹誤會 網民驚：原來犯法㗎？

網上近日流傳一張相片，指港鐵深水埗站有職員截查多名男子，疑似嚴打站內交收，嚇到準備交收嘅買家即時「縮沙」改地點。事件引發網民熱議，有人直言唔知港鐵站內交收原來犯法。港鐵其後澄清，當時只係進行例行查票工作，並非針對交收人士。

交收撞正查票 買家嚇到改地點

事緣有深水埗店舖喺社交平台Threads發文，話原本約咗客人在港鐵深水埗站閘內交收，點知客人去到現場，見到有至少3名港鐵職員喺閘口附近截查幾名黑衣男子，氣氛緊張。客人見狀即刻「轉軚」，打電話叫停交易，話「唔好喺閘內交收啦，出站口交收啦」。

店主其後喺帖文提醒同行，話「而家喺地鐵站交收捉得好緊」，呼籲大家最近要「避下風頭」，改喺路邊交收或者門市取貨。

港鐵澄清：只係查票 並非捉交收

港鐵回覆傳媒查詢時澄清，根據記錄，當日（8月24日）港鐵人員喺深水埗站進行嘅係查票工作，並非針對交收人士，而被截查嘅人亦都唔係喺度交收。

不過，雖然今次係一場誤會，但根據《港鐵附例》第30條，任何人未經港鐵書面特准，不得喺鐵路處所內出售、為出售而展示或要約出售任何貨品、貨物或服務。違者一經定罪，最高可被罰款5,000元及監禁6個月。換句話說，喺港鐵站內進行商業交收，的確有機會觸犯法例。

網民：原來唔可以交收㗎？

事件曝光後，大批網民表示驚訝，紛紛留言：「而家先知地鐵站係唔可以交收，其實犯咩法？」、「免費送嘢畀人約地鐵站交收又得唔得呢？」亦有網民質疑港鐵點界定「交易」，認為只要唔涉及現金交易就「吹佢唔脹」。

港鐵早於2015年已曾嚴打站內網購交收，並於多個車站張貼「禁止交收貨物」的警告。為免誤墮法網，市民進行網購交收時，最好都係選擇站外公眾地方，或者索性門市自取、郵寄，穩陣啲。

//

喜歡我們的內容？別忘了CLSS🙏
你每個互動都是我們繼續的最大動力～追蹤我們獲取最新資訊

有料想報？簡單寫低事發時間、經過、地點，同埋發生咩事，
Send嚟我哋嘅報料熱線：
WhatsApp # 9106 0617

我哋係#tagline香港 ，聚焦你所關心嘅🇭🇰