深圳希爾頓歡朋酒店蟲咬事件 女客雙腿滿紅疹 酒店稱「有蟲正常」 前台「自己湊」100蚊賠償惹熱議

港人北上深圳玩樂或公幹，揀酒店真係要打醒十二分精神。近日，內地一對情侶入住深圳寶安新安希爾頓歡朋酒店（Hampton by Hilton），原本打算住5晚，點知女事主雙腿陸續出現大量紅腫、極度痕癢嘅紅疹，最終要去醫院，確診「蟲咬皮炎」。最離譜嘅係，酒店職員竟然話「客房內有蟲子屬於正常情況」，仲話可以「自己湊」100蚊人仔當賠償。

入住兩晚開始出紅疹 換房後即無事

事主柳先生（化名）同女友桂女士（化名）8月16號入住酒店，原訂住5晚，房費總共2014蚊人仔。頭兩晚，桂女士發現雙腿開始出現一啲紅腫嘅包，本來以為只係普通蚊咬，冇特別理會。點知到咗第三晚，佢一瞓醒就發現雙腿佈滿大量紅疹，又紅又腫，同平時俾蚊咬嘅症狀完全唔同。

桂女士懷疑房入面有蠓蟲或者其他蟲，於是向酒店前台投訴。酒店之後將佢哋後兩晚嘅房間升級做套房，桂女士話，換房之後就再冇出現過呢啲症狀。

酒店經理：有蟲正常 前台曾稱「有先例」

桂女士向《揚子晚報》表示，當時客房經理睇完佢雙腿嘅紅疹之後，竟然話「客房內有蟲子屬於正常情況」，仲話可能係過敏，叫佢自己去醫院檢查。桂女士最終去咗醫院，醫生確診係「蟲咬皮炎」，但判斷唔到具體係咩蟲咬嘅。

桂女士更指出，前台職員喺溝通期間曾經透露，之前都有其他住客試過類似俾蟲咬嘅情況。不過酒店方面之後就堅決否認，話開業至今從未收過類似投訴。

前台「自己湊100蚊」賠償 酒店稱屬「個人不當提議」

賠償問題先係今次事件嘅最大爭議。桂女士話，酒店初時只係同意承擔30幾蚊嘅醫藥費，之後有職員提出額外賠償100蚊，仲話呢筆錢可以由前台員工「自己湊」出嚟。

桂女士最終冇收呢筆錢，佢話：「我哋都唔想前枱員工去承擔呢個費用。」

酒店方面事後回應，承認「100蚊由前枱湊」確實係當值員工提出嘅，但強調呢個只係員工個人嘅「不當口頭提議」，唔係酒店官方嘅賠償方案，亦都冇經過管理層同財務審批。酒店已經對相關員工進行內部約談同培訓。

酒店方面表示，願意透過原本嘅預訂渠道，以每晚100蚊（頭3晚共300蚊）嘅標準退款。不過柳先生話，因為出差關係，經原渠道退款實際收唔到錢，佢堅持酒店要經正式渠道處理，唔接受私人轉賬。

酒店稱每周消毒 事主促當局調查衛生

涉事酒店強調，日常會執行客房清潔、蟲害防控同環境消毒等流程，每周進行一次消毒並留有紀錄。酒店紀錄顯示，事主8月16號入住，酒店8月10號同17號都做過消毒。接獲投訴之後，酒店亦對涉事客房同同樓層進行咗專項消毒同蟲害排查。

目前，柳先生同桂女士已經唔再將經濟賠償視為主要要求，而係希望深圳相關部門可以深入調查酒店嘅衛生狀況，查清楚房入面係咪真係有蟲害，以免更多住客受害。

深圳寶安新安希爾頓歡朋酒店2024年開業，位於深圳市寶安區，共有158間客房，近期普通房約500蚊人仔一晚。

//

喜歡我們的內容？別忘了CLSS🙏
你每個互動都是我們繼續的最大動力～追蹤我們獲取最新資訊

有料想報？簡單寫低事發時間、經過、地點，同埋發生咩事，
Send嚟我哋嘅報料熱線：
WhatsApp # 9106 0617

我哋係#tagline香港 ，聚焦你所關心嘅🇭🇰